Gesah Kito (3) : Beduso Besak
Oleh Wak Amin
MAKLUMATNEWS.com, Palembang — Sambil ngudut di pos ronda, Cek Mat mijit-mijit palaknyo.
Dak tau ngapo.
Wong yang balik dari kebon dak berani negurnyo.
Bukan dak berani. Tapi yo itu, takutnyo Cek Mat tesinggung.
Naaa …
Pas Cek Lengser lewat becepet dio turun dari sepedanyo.
Kriiiing …
Kriiiing …
Kriiiing …
“Assalamualaikum,” kato Cek Lengser sambil nyenderke sepedanyo di tiang pos ronda.
“Waaalaikum salam warohmatullohi wabarokaatuh.”
Na mak itu.
“Ngapo cak peningtu. Kuperatike tadi mijit-mijit palak terus. Ado apo?”
“Dak apo-apo Cek.”
“Ai dakken ado dak katik apo-apo. Ngomong bae samo aku. Katik duit, aku ado walau dak banyak.”
He he he …
“Cubo rokok kitotu Cek. Nak nyicip apo rasonyo.”
“Yang mano. Yang manual apo otomatis?”
“Maksudnyo?”
“Kalu yang manual isi dewek tembakunyo.”
“Kalu yang otomatis?”
“Langsung sundut pake’ api, isep.”
He he he …
Ado-ado bae kauni Cek.
“Jadi yang mano?”
“Otomatis bae.”
Singkat cerito. Ngudutla Cek Matni. Cek Lengser jugo.
Samo-samo ngudut.
Parak sore mak ini alangke lemak ngu dut. Cuman kurang sikok bae. Dak katik banyu kopi.
Seisep belum seomongan.
Duwo isep masih mak itu.
Sedieman.
Isepan yang ketigo baru Cek Mat ngo mong, itu jugo tepakso karno tibo-tibo batuk.
“Akutu pening alangke banyak wong selingkuh mak ini ari.”
“Oooo selingkuh. Ngapo mak itu. Wong lemak selingkuh kau yang pening. Lolo namonyotu.”
He he he …
“Aku kalu wong biaso yang selingkuh biaso bae Cek. Mati pegila sano.”
He he he …
“Yang embuat akuni peningni yang selingkuh bukan wong biaso.”
” Kalu bukan wong biaso, wong Mano Cek. Wong wongan apo?”
“Pak RT, Cek.”
“Astaghfirullah. Pak RT manotu?”
“Pak RT di kota besak sano.”
“Alhamdulilah bukan RT kito.”
“Itu yang Lanangnyo Cek. Yang betinonyo bini Kades.”
Cek Lengser tekejut.
Ampir bae rokoknyo nyampak.
“Bini Kades kito bukan?”
“Alhamdulillah bukan Cek.”
“Alhamdulillah. Teruss …”
“Duwo-duwonyo diusir warga Cek,” kato Cek Mat sambil ngembek lagi rokoknyo yang tadi ditarok denget di asbak rokok alumenium.
“Syukurla,” uji Cek Lengser kesenangan.
Yang kupikirketu, kato Cek Mat, apo dak katik utak, buyan atau apo.
“Bukan dak katik otak mun ujiku Cek. Tapi la kebiasoan.”
“Kebiasoan makmanotu?”
“Kebiasoan lemak. Kan main yang
sikoktu lemak. Tapi karno keterusan jadi malek. Bener dak kiro-kiro Cek?”
“Bener. Bosen Mak uji wong jaman now ni.”
He he he …
“Karno malek pengen nyubo yang lain. Taunyo lebih lemak. Belanjut ruponyo.”
“Kenyanyak yo Cek.”
“Bener kato kau Cek. Karno lemak idak pandang bulula. Nak bini uwong nak laki uwong, sikat baeee.”
Gampang soal duso. Pas la tuwo becepet tobat.
He he he …
“Tapi Cek. Makmanola caro ngeremnyo?”
“Gampang Cek.”
“Makmano?”
“Pertamo, yang selingkuh dihukum berat..”
“Keduwo.”
“Hindari wong yang kito galak. Misalnya Kito yang lanangni seneng samo betino lain, langsung ilangke. Sebab, bemulo dari senengla kito galak belajuan.”
“Ketigo Cek.”
“Jangan lupo pikirke pulo dampak buruk dari selingkuhtu. Jangan mikirke yang lemak bae ..
“Keempat.”
“Banyak-banyak berzikir mintak perlindungan dari Allah SWT.”
“Dan yang penting, hubungan kito samo bini atau sebaliknyo tebuka’ la.”
“Maksudnyo Cek?”
“Apo yang kito seneng samo dak seneng omongke bae samo bini kito.”
“Misalnyo Cek.”
“Seminggu apo duwo minggu sekali belajuan …”
He he he …
“Bener dak Cek?”
“Benerlatu Cek.”
